鳥仔 ê 名 - 認捌鳥仔 ê 台語
為著予大家認捌鳥仔 ê 台語，我整理了這个清單，予大家方便揣鳥仔 ê 台語名。《鳥仔 ê 名 - 認捌鳥仔 ê 台語》依據上新 ê 鳥類分類研究 kah 號明理路，盡量為每一種鳥仔揣適合 ê 名，希望會當藉著認捌鳥仔 ê 名，嘛有愈來愈濟人來使用這个漸漸消失 ê 語言。
為何欲創作《鳥仔 ê 名 - 認捌鳥仔 ê 台語》？
- 隨著中国国民党來台，打壓本土語言 ê 發展，現代鳥仔分類 ê 研究主要是依華語為主，真濟鳥仔 ê 台語名猶原停留 tī 日本時代，無法度配合上新 ê 鳥仔分類研究，所以辭典內底嘛攏揣無。仝款一个台語俗名，過去可能 kan-na 知影一个物種，m̄-koh 因為研究 ê 進步，tsit-má 才知影 m̄-nā 一个物種，結果鳥仔攏無適當 ê 俗名來討論，因爲彼時陣 ê 鳥仔俗名，大部分是統稱為主。
- 市面上 ê 鳥仔名簿主要是使用華語，用台語寫 ê 鳥仔名簿是誠正少。為著補紩這 ê 空缺，《鳥仔 ê 名 - 認捌鳥仔 ê 台語》希望會當用現代分類學 ê 角度，重新看待台灣本土 ê 鳥仔名，所以內底包含真濟台語新詞 ê 創作，目的是鼓勵 lán 去揣看覓，敢有 khah 適合鳥仔物種 ê 台語名，以期待未來會當有一本台語為主 ê 鳥仔名簿。
- 若是以前無 tī 台灣生活 ê 鳥仔，iah 是外國 ê 鳥仔，可能 iah 無適合 ê 台語名。
- 真濟人攏認為專業 ê 領域 kan-na 會當用華語講，m̄-koh 其實台語 kah 日語、英語仝款，有文法、有專門 ê 字，認捌鳥仔當然 mā 會當用台語講！
來看這 ê 範例，水尖仔是一般鷸科鳥仔 ê 統稱，有真濟物種 lóng 會使叫水尖仔，這是水尖仔、he ê mā 是水尖仔，用台語講，會毋知是佗一 ê 物種，除非用華語講「黦鷸」。
《鳥仔 ê 名 - 認捌鳥仔 ê 台語》ê 目標就是去解決 tse ê 問題。若依據伊 ê 外觀形體，叫伊「紅腰土礱鉤鷸 âng-io-thôo-lâng-kau-u̍t」仰是「紅腰土礱鉤仔 âng-io-thôo-lâng-kau-á」著非常清楚，mā 會當 kah 其他 ê 水尖仔區別。
建議台語名
- 依據外觀「紅腰 âng-io」 + 本土台語名「土礱鉤仔 thôo-lâng-kau-á」 + 分類名「鷸 u̍t」
號名理路 hō-miâ lí-lōo
- 若是有台灣本土 ê 台語俗稱，代先使用。
- 若是台灣本土 ê 台語俗稱是統稱，但是 m̄-nā 一 ê 物種，參考英語、日語、華語 ê 用法，頭前加上形容詞分別。
- 若揣無台灣本土 ê 台語俗名，原則上盡量尊重中華野鳥協會公告 ê 華語台灣鳥類名錄命名。m̄-koh 因為華語 ê 氣口不一定對同台語 ê 用法，所以 mā 會參考英語、日語、鳥仔 ê 形體外觀、色水命名。
- 分類名盡量用台灣本土 ê 台語號名。
- 範例一
- 範例二
- 範例三
- 範例四
- 範例五
下跤 ê 物種攏是青笛仔
- 斯氏繡眼 -> 斯氏青笛仔 su-sī-tshenn-thî-á
- 日菲繡眼 -> 日菲青笛仔 ji̍t-hui-tshenn-thî-á
- 低地繡眼 -> 低地青笛仔 kē-tē-tshenn-thî-á
- 紅脇繡眼 -> 赤胳青笛仔 tshiah-koh-tshenn-thî-á
下跤 ê 物種攏是水避仔 ê 一種
- 小鸊鷉 -> 水避仔 tsuí-pī-á
- 角鸊鷉 -> 角水避 kak-tsuí-pī
- 赤頸鸊鷉 -> 紅頸水避 âng-kún-tsuí-pī
- 冠鸊鷉 -> 聳毛水避 tshàng-moo-tsuí-pī
- 黑頸鸊鷉 -> 烏頸水避 oo-kún-tsuí-pī
下跤 ê 物種 tī 辭典揣無台語俗名
- 鐵嘴鴴仔 -> 厚喙鴴 kāu-tshuì-hîng-á
- 赤腹鶇仔 -> 紅腹鶇 âng-pak-tong-á
- 堪察加柳鶯 -> 堪察加柳鶯 kham-tshâ-tsham-liú-ing
- 紅喉潛鳥 -> 紅喉藏水鳥 âng-âu-tshàng-tsuí-tsiáu
mā 會參考日語、英語，無一定參考華語
- 褐翅鴉鵑 -> 大草嘓 tuā-tsháu-kok。
- 斑背潛鴨 -> 鈴鴨 lîng-ah。
- 蠣鴴 -> 食蚵仔鳥 tsia̍h-ô-á-tsiáu
分類名盡量用台灣本土 ê 台語號名
- 夜鷹目 -> 石磯仔目 tsio̍h-ki-á-ba̍k
- 鸊鷉科 -> 水避仔科 tsuí-pī-á-koa
- 秧雞科 -> 米雞仔科 bí-ke-á-koa
- 水雉科 -> 菱角鳥科 lîng-kak-niû-koa
- 草鴞科 -> 猴面鷹科 kâu-bīn-ing-kho
鳥仔名 ê 註解
- 🎯：推薦做為 tse ê 唯一物種 ê 台語俗名。
- ✳️：統稱，有兩個以上 ê 物種 lóng 會使叫 tes ê 名。
重要 ê 參考
- 📕 上新 ê 分類參考 eBird kah eBird Taiwan鳥類名錄 2024.10 (製表：eBird Taiwan))。
- 📕 台語俗名參考 《Hêng góa Tâi-oân Chiáu-á Miâ（還我台灣鳥á名）》 kah 《台灣野鳥鄉土名》。
- 📕 華語俗名參考 eBird 佮台灣生物多樣性網絡。
- 📕 台語字參考 ChhoeTaigi 台語辭典 kah 教育部臺灣台語常用詞辭典。
- 📕 鳥仔 ê 外觀參考 The Sibley Field Guide by David Allen Sibley。
- 📕 鳥仔冊參考台灣野鳥手繪圖鑑(二版)。
- 📕 鳥仔圖使用 iNaturalist 面頂 ê
CC0、CC-BY、CC-BY-NC授權。
聯絡我
這个網站大部分是利用下班有閒 ê 時間來寫，所以翻新 ê 速度較慢。你若有發現寫毋著 ê 所在，iah 是有建議 ê 名，請留話 iah 是寫電子批 kā 我講，我會盡量揣時間來改，請手梳攑懸，多謝！
🚀 你若有興趣做伙合作，mā 會當 kā 我講。
- ✉️ 電子批: minsiansu@gmail.com
- 📸 相片冊: siansiansu